ஷிராந்தி ராஜபக்ச சிங்கப்பூர் பயணம்

இலங்கையின் முன்னாள் முதல் பெண்மணியும், முன்னாள் ஜனாதிபதி மகிந்த ராஜபக்சவின் மனைவியுமான ஷிராந்தி ராஜபக்ச இன்று (16) அதிகாலை சிங்கப்பூர் நோக்கி இலங்கையிலிருந்து புறப்பட்டுச் சென்றுள்ளார்.

அவர் அதிகாலை சுமார் 1.10 மணியளவில் கட்டுநாயக்க பண்டாரநாயக்க சர்வதேச விமான நிலையத்திலிருந்து சிங்கப்பூர் ஏர்லைன்ஸ் விமானம் SQ-469 மூலம் சிங்கப்பூர் நோக்கிப் புறப்பட்டதாக விமான நிலையத் தகவல்கள் தெரிவிக்கின்றன. அவருடன் உறவினரான அன்னே டி லிவேராவும் பயணித்துள்ளதாக செய்திகள் தெரிவிக்கின்றன.

ஷிராந்தி ராஜபக்ச நேற்று (15) உடல்நலக்குறைவு காரணமாக கொழும்பிலுள்ள தனியார் வைத்தியசாலையொன்றில் அனுமதிக்கப்பட்டிருந்ததாகவும், அங்கிருந்து நேரடியாக விமான நிலையத்துக்குச் சென்று சிங்கப்பூர் பயணத்தை மேற்கொண்டதாகவும் தகவல்கள் வெளியாகியுள்ளன. சிங்கப்பூரில் மருத்துவ சிகிச்சை பெறுவதற்காக அவர் சென்றதாக சில ஊடகங்கள் செய்தி வெளியிட்டுள்ளன.

இந்நிலையில், நிதிக் குற்ற விசாரணைப் பிரிவான (FCID) முன்னிலையில் செப்டம்பர் 24ஆம் திகதி ஆஜராகுமாறு ஷிராந்தி ராஜபக்சவுக்கு அறிவிக்கப்பட்டுள்ளதாக பல ஊடகங்கள் செய்தி வெளியிட்டுள்ளன. 

இந்த விசாரணை ‘சிரிலிய சவிய’ (Siriliya Saviya) அமைப்புடன் தொடர்புடைய கணக்கு மற்றும் நிதிப் பரிவர்த்தனைகள் தொடர்பான விசாரணையுடன் தொடர்புடையதாக தெரிவிக்கப்படுகிறது.

ஷிராந்தி ராஜபக்ச ஏற்கனவே FCID அழைப்பாணையைப் பெற்றிருந்த நிலையிலேயே நாட்டை விட்டு வெளியேறியதாக வெளியாகியுள்ள செய்திகளை அவர் சார்பில் பேசிய சட்டத்தரணி மனோஜ் மறுத்துள்ளார். 

அவரின் கூற்றுப்படி, ஷிராந்தி ராஜபக்ச விமான நிலையத்துக்குச் சென்ற பின்னரே, விமானம் புறப்படுவதற்கு சற்று முன்னதாக அழைப்பாணை வழங்கப்பட்டதாக அவர் தெரிவித்துள்ளார்.

‘சிரிலிய சவிய’ அமைப்புடன் தொடர்புடையதாகக் கூறப்படும் சில நிதிப் பரிவர்த்தனைகள், அரச நிறுவனங்களிடமிருந்து கிடைத்த நிதி, வரிச்சலுகையின் கீழ் வாகனங்களை இறக்குமதி செய்தமை மற்றும் அமைப்பின் வாகனங்களின் பயன்பாடு உள்ளிட்ட பல விடயங்கள் தொடர்பில் விசாரணைகள் இடம்பெற்று வருவதாக  செய்திகள் வருகின்றன.

மேலும், சிறுவர் மருத்துவமனைக்கான CT ஸ்கேன் இயந்திரத்தை கொள்வனவு செய்வதற்காக மேற்கொள்ளப்பட்ட நிதி சேகரிப்பு நடவடிக்கைகள், HIV/AIDS தடுப்பு திட்டங்களுக்காக சேகரிக்கப்பட்ட நிதி மற்றும் அமைப்புடன் தொடர்புடைய சில சொத்துக்கள் மற்றும் வங்கிக் கணக்குகள் தொடர்பான விடயங்களும் விசாரணையின் கீழ் உள்ளதாக அந்த செய்தி தெரிவிக்கிறது. 

இவை விசாரணையில் முன்வைக்கப்பட்டுள்ள குற்றச்சாட்டுகள் மற்றும் விசாரணை விடயங்களாகும்; அவை நீதிமன்றத்தால் நிரூபிக்கப்பட்ட குற்றங்களாகக் கருதப்படக்கூடாது என்றும் அவரது சார்பில் இருந்து செய்திகள் வெளிவருகின்றன