சர்வதேச முதியோர் தினத்தை முன்னிட்டு அமைச்சர் கலாநிதி உபாலி பன்னிலவின் செய்தி

ஒக்டோபர் முதலாம் திகதி அனுஷ்டிக்கப்படும் சர்வதேச முதியோர் தினத்தை முன்னிட்டு கிராமிய அபிவிருத்தி, சமூகப் பாதுகாப்பு மற்றும் சமூக வலுவூட்டல் அமைச்சர் கலாநிதி உபாலி பன்னில விடுத்துள்ள செய்தி

ஒக்டோபர் 01ஆம் திகதி அனுஷ்டிக்கப்படும் சர்வதேச முதியோர் தினம், எமது சமூகத்தை கட்டியெழுப்புவதற்காக பல தசாப்தங்களாக தமது உழைப்பு, அறிவு, அனுபவம் மற்றும் அர்ப்பணிப்பை வழங்கிய முதியோர் தலைமுறையினருக்கு எமது மரியாதையையும் நன்றியையும் வெளிப்படுத்துவதற்கான ஒரு சிறப்பான சந்தர்ப்பமாகும்.

Must Read –மலையக மக்களை இழிவாக விமர்சிப்பவர்கள்  அதனை நிறுத்திக்கொள்ள வேண்டும் என்கிறார் பிரதி அமைச்சர் பிரதீப்

2026ஆம் ஆண்டுக்கான சர்வதேச முதியோர் தினத்தின் கருப்பொருளான “The Age of Longevity: Rethinking Systems for Longer Lives” என்பதன் மூலம், மக்கள் நீண்ட காலம் வாழும் புதிய சமூக யதார்த்தத்திற்கு ஏற்ப சுகாதாரம், சமூகப் பாதுகாப்பு, பொருளாதாரம் மற்றும் சமூக அமைப்புகளை மறுசீரமைப்பதன் அவசியம் வலியுறுத்தப்படுகிறது.

நீண்ட ஆயுள் என்பது அதிக ஆண்டுகள் வாழ்வது மட்டுமல்ல. கண்ணியத்துடனும், பாதுகாப்புடனும், ஆரோக்கியத்துடனும் சமூகத்தின் செயற்பாட்டுமிக்க உறுப்பினர்களாக வாழக்கூடிய சூழலை உருவாக்குவதுமாகும்.

“வளமான நாடு – அழகான வாழ்க்கை” என்ற கொள்கைப் பிரகடனத்தில், முதியோர் சமூகத்தின் சுமையாக அல்லாது, நாட்டின் அனுபவ வளமாகக் கருதப்படுகின்றனர். அவர்களின் கண்ணியம், உரிமைகள் மற்றும் சமூகப் பாதுகாப்பை உறுதிப்படுத்தி, அவர்கள் பாதுகாப்பானதும் தரமானதுமான வாழ்க்கையை வாழ்வதற்குத் தேவையான சூழலை உருவாக்குவது அரசாங்கத்தின் பொறுப்பாக அடையாளப்படுத்தப்பட்டுள்ளது.

எமது முதியோர் தலைமுறையினர் இன்றைய இலங்கையை கட்டியெழுப்புவதற்காக தமது வாழ்க்கையின் பெறுமதியான காலத்தை அர்ப்பணித்தவர்களாவர். அவர்களின் அனுபவங்கள், அறிவு, சமூக விழுமியங்கள் மற்றும் வாழ்க்கைப் பாடங்களை அடுத்த தலைமுறைக்கு எடுத்துச் செல்வது எம் அனைவரினதும் பொறுப்பாகும்.

எனவே, முதியோரைப் பராமரிப்பது என்பது ஒரு குடும்பத்தின் அல்லது அரசாங்கத்தின் பொறுப்பு மட்டுமல்ல; ஒட்டுமொத்த சமூகத்தின் பொறுப்பாகும்.

Must Read –இலங்கை இராணுவத்தின் 77ஆவது ஆண்டு நிறைவு: ஸ்ரீ தலதா மாளிகையில் சமய வழிபாடு

முதியோர் குடிமக்களின் சுகாதாரம் மற்றும் சமூகப் பாதுகாப்பை வலுப்படுத்துதல், அவர்களின் பொருளாதாரப் பாதுகாப்பை உறுதிப்படுத்துதல், அவர்கள் கண்ணியத்துடன் வாழ்வதற்குத் தேவையான சூழலை உருவாக்குதல் மற்றும் வயது முதிர்வின் காரணமாக ஏற்படும் புறக்கணிப்புகளில் இருந்து அவர்களைப் பாதுகாத்தல் ஆகியவை எமது முதியோர் கொள்கையின் முக்கிய நோக்கங்களாகும்.

அதேவேளை, மூத்த குடிமக்களை சமூகத்தில் செயலற்ற ஒரு குழுவாகக் கருதாமல், அவர்களின் திறமைகள் மற்றும் அனுபவங்களை நாட்டின் அபிவிருத்திக்குப் பயன்படுத்தக்கூடிய வழிமுறைகளை வலுப்படுத்துவதும் அவசியமாகும்.

தலைமுறைகளுக்கு இடையிலான உறவுகளை வலுப்படுத்தி, முதியோர் தலைமுறையினரின் அறிவையும் அனுபவங்களையும் இளைய தலைமுறையுடன் பகிர்ந்து கொள்வதற்கான வாய்ப்புகளை உருவாக்குவதன் மூலம், அதிக பரிவும் ஒற்றுமையும் கொண்ட சமூகத்தை கட்டியெழுப்ப முடியும்.

இன்று இலங்கை எதிர்கொள்ளும் மக்கள்தொகை கட்டமைப்பில் ஏற்படும் மாற்றங்களின் பின்னணியில், முதியோர் மக்களின் தேவைகளைப் பூர்த்தி செய்வதற்கு பாரம்பரிய அணுகுமுறைகள் மாத்திரம் போதுமானதாக இல்லை.

சுகாதார சேவைகள், சமூகப் பாதுகாப்பு, வீடமைப்பு, போக்குவரத்து, டிஜிட்டல் வசதிகள் மற்றும் சமூகப் பங்கேற்பு உள்ளிட்ட அனைத்து துறைகளும் முதியோர் குடிமக்களுக்கு உகந்த வகையில் அபிவிருத்தி செய்யப்படுவது எமக்கு முன்னுள்ள முக்கிய சவாலாகும்.

முதியோர் தலைமுறையினருக்கு பாதுகாப்பான நிகழ்காலத்தையும் கண்ணியமான எதிர்காலத்தையும் உருவாக்குவது அவர்களுக்காக மாத்திரம் மேற்கொள்ளப்படும் முதலீடு அல்ல. அது நாட்டின் எதிர்காலத்திற்காக மேற்கொள்ளப்படும் முதலீடாகும்.

இன்று நாம் முதியோருக்கு வழங்கும் மரியாதை, பாதுகாப்பு மற்றும் சமூக உத்தரவாதம் ஆகியவை நாளைய தலைமுறைக்கு கிடைக்கப்பெறும் சமூகத்தை தீர்மானிக்கும்.

எனவே, 2026 சர்வதேச முதியோர் தினத்தில், நீண்ட ஆயுளை வெறுமனே நீண்ட காலம் வாழ்வதாக அல்லாமல், ஆரோக்கியமான, பாதுகாப்பான, கண்ணியமான மற்றும் அர்த்தமுள்ள வாழ்க்கையாக மாற்றுவதற்கான புதிய நோக்குடன் நாம் அனைவரும் ஒன்றிணைந்து செயற்படுவோம்.

எமது நாட்டைக் கட்டியெழுப்பிய முதியோர் தலைமுறையினருக்கு மரியாதை செலுத்தி, அவர்களின் உரிமைகளைப் பாதுகாத்து, அவர்களின் அனுபவங்களையும் அறிவையும் எதிர்கால தலைமுறைக்கு வழங்குவதற்குத் தேவையான சூழலை உருவாக்குவோம்.

அனைத்து முதியோர் குடிமக்களுக்கும் ஆரோக்கியமான, பாதுகாப்பான, கண்ணியமான மற்றும் மகிழ்ச்சியான வாழ்க்கையைப் பிரார்த்திக்கிறேன்.

கலாநிதி உபாலி பன்னில – கிராமிய அபிவிருத்தி, சமூகப் பாதுகாப்பு மற்றும் சமூக வலுவூட்டல் அமைச்சர்