தேசிய அறிவுஜீவிகள் அமைப்பு- உபாலி பன்னில

தேசிய மக்கள் சக்தியின் தேசிய அறிவுஜீவிகள் அமைப்பின் களனி தொகுதி மாநாடு கடந்த கிரிபத்கொட, சனாரா மந்திர ஹோட்டல் வளாகத்தில் நடைபெற்றது.

கிராமிய அபிவிருத்தி, சமூகப் பாதுகாப்பு மற்றும் சமூக வலுவூட்டல் அமைச்சர் கலாநிதி உபாலி பன்னில, முன்னாள் மின்சக்தி அமைச்சர் மற்றும் நாடாளுமன்ற உறுப்பினர் குமார ஜயக்கொடி, நாடாளுமன்ற உறுப்பினர் ருவன்திலக ஜயக்கொடி ஆகியோரின் தலைமையில் இம்மாநாடு நடைபெற்றது.

களனி, பேலியகொட மற்றும் கிரிபத்கொட ஆகிய பகுதிகளைச் சேர்ந்த புத்திஜீவிகள், வர்த்தகர்கள் மற்றும் தொழில்முறை நிபுணர்கள் கலந்துகொண்ட இந்தச் சந்திப்பில் புதிய நிர்வாகக் குழுவும் செயற்குழுவும் தெரிவுசெய்யப்பட்டன.

இதன்போது அமைச்சர் கலாநிதி உபாலி பன்னில, முன்னாள் அமைச்சர் குமார ஜயக்கொடி மற்றும் நாடாளுமன்ற உறுப்பினர் ருவன்திலக ஜயக்கொடி ஆகியோர் கலந்துகொண்டிருந்தவர்களிடம் உரையாற்றினர்.

மாநாட்டில் உரையாற்றிய அமைச்சர் உபாலி பன்னில, மக்கள் எதிர்பார்த்த சமூக மாற்றத்தை ஏற்படுத்துவதற்காக ஒரு அமைப்பாக தேசிய அறிவுஜீவிகள் அமைப்பு பெரும் பங்களிப்பை வழங்கியுள்ளதாகவும், மக்களின் எதிர்பார்ப்புகளை நிறைவேற்றுவதற்கு அரசாங்கம் அர்ப்பணிப்புடன் செயற்பட்டு வருவதாகவும் தெரிவித்தார்.

மேலும், கடந்த 76 ஆண்டுகளில் பொருளாதார, அரசியல் மற்றும் சமூக ரீதியாக நாடு அனைத்து துறைகளிலும் கடுமையான பின்னடைவை எதிர்கொண்டதன் விளைவாக இலங்கை திவாலான நாடாக மாறியதாகவும் அவர் குறிப்பிட்டார். அந்த திவால்நிலையிலிருந்து நாட்டை மீட்டெடுப்பதுடன், அரசியல், அரச துறை, அரச சார்பற்ற துறை மற்றும் தனியார் துறை உள்ளிட்ட அனைத்து துறைகளிலும் உண்மையான மாற்றத்தை ஏற்படுத்துவதற்காக அரசாங்கம் நடவடிக்கை எடுத்து வருவதாகவும் அமைச்சர் தெரிவித்தார்.

கடந்த இரண்டு ஆண்டுகளில் பொலிஸார்,

 இலஞ்சம் அல்லது ஊழல் விசாரணை ஆணைக்குழு, சட்டமா அதிபர் திணைக்களம் மற்றும் குற்றப் புலனாய்வுத் திணைக்களம் (CID) உள்ளிட்ட விசாரணை நிறுவனங்கள் அரசியல் தலையீடுகளின்றி சுயாதீனமாக செயற்படக்கூடிய வகையில் நிறுவப்பட்டுள்ளதாகவும் அவர் கூறினார்.

அத்துடன், நாடாளுமன்ற உறுப்பினர்களின் ஓய்வூதியம் மற்றும் முன்னாள் ஜனாதிபதிகளுக்கான விசேட சலுகைகள் இரத்துச் செய்யப்பட்டுள்ளதாகவும், சர்வதேச நாணய நிதியத்துடன் (IMF) இணைந்து கடன் மறுசீரமைப்பு நடவடிக்கையை வெற்றிகரமாக இறுதிக் கட்டத்துக்கு கொண்டு வந்துள்ளதாகவும் அமைச்சர் குறிப்பிட்டார்.

மேலும், வெளிநாடுகளுக்குத் தப்பிச் சென்றிருந்த சுமார் 700 குற்றவாளிகளை மீண்டும் நாட்டுக்கு அழைத்து வருவதற்கான நடவடிக்கைகள் உள்ளிட்ட பல்வேறு செயற்பாடுகள் மக்கள் வழங்கிய ஆணைக்கு அமைவாக முன்னெடுக்கப்பட்டுள்ளதாகவும் அவர் தெரிவித்தார்.

ரூ.8,500 அஸ்வெசும நலன்புரி உதவித்தொகை பெற்ற குடும்பங்களுக்கு அந்தத் தொகை ரூ.10,000 ஆகவும், ரூ.15,000 பெற்ற குடும்பங்களுக்கு வழங்கப்பட்ட தொகை ரூ.17,500 ஆகவும் அதிகரிக்கப்பட்டுள்ளதாக அமைச்சர் தெரிவித்தார்.

அதேபோன்று, மாற்றுத்திறனாளிகளுக்கான மாதாந்த கொடுப்பனவு ரூ.7,500 இலிருந்து ரூ.10,000 ஆகவும், மூத்த பிரஜைகளுக்கான கொடுப்பனவு ரூ.3,000 இலிருந்து ரூ.5,000 ஆகவும் அதிகரிக்கப்பட்டுள்ளதாகவும் அவர் குறிப்பிட்டார்.

பல்கலைக்கழக மாணவர்களுக்கான மகாபொல உதவித்தொகை ரூ.5,000 இலிருந்து ரூ.10,000 ஆக இரட்டிப்பாக்கப்பட்டுள்ளதுடன், மாணவர் உதவித்தொகை ரூ.9,000 ஆக அதிகரிக்கப்பட்டுள்ளதாகவும் அமைச்சர் தெரிவித்தார்.

‘டிட்வா’ சூறாவளி ஏற்பட்ட காலப்பகுதியிலும், மத்திய கிழக்கில் நிலவிய யுத்த சூழ்நிலையின்போதும் மக்களின் அன்றாட வாழ்க்கை பாதிக்கப்படாத வகையில் நடவடிக்கைகள் மேற்கொள்ளப்பட்டதாக அமைச்சர் வலியுறுத்தினார்.

 இதேவேளை, இடைநிறுத்தப்பட்டிருந்த பாரிய அபிவிருத்தித் திட்டங்களை மீண்டும் ஆரம்பிக்கவும் நடவடிக்கை எடுக்கப்பட்டுள்ளதாக அவர் கூறினார்.

இந்தியா, சீனா மற்றும் அமெரிக்கா உள்ளிட்ட நாடுகளின் புவிசார் அரசியல் நோக்கங்களை அடையாளம் கண்டு, சர்வதேச உறவுகளைப் பேணுவதுடன், வெளிநாட்டு அரச தலைவர்களின் இலங்கை விஜயங்கள், உலக வங்கி, ஆசிய அபிவிருத்தி வங்கி (ADB) மற்றும் ஐக்கிய நாடுகள் சபை (UN) ஆகியவற்றுடன் வலுவான உறவுகளைப் பேணுவதன் ஊடாக நாட்டின் இராஜதந்திர உறவுகள் வலுப்படுத்தப்பட்டு வருவதாகவும் அமைச்சர் உபாலி பன்னில தெரிவித்தார்.