சவூதியில் அனோஜனின் மரண தண்டனை: பைசர் முஸ்தபா கோரிக்கை

சவூதி அரேபியாவில் கடுமையான சட்ட நடவடிக்கையை எதிர்கொண்டுள்ள இலங்கை இளைஞரான சிவராசா அனோஜனின் உயிரைக் காப்பாற்றுவதற்காக இராஜதந்திர ரீதியிலும் சட்ட ரீதியிலும் துரிதமான மற்றும் வலுவான தலையீட்டை மேற்கொள்ள வேண்டிய அவசரத் தேவையை நாடாளுமன்ற உறுப்பினரும் ஜனாதிபதி சட்டத்தரணியுமான பைசர் முஸ்தபா வலியுறுத்தியுள்ளார்.

ஒரு நாட்டின் இறையாண்மையையும் சட்டத்தையும் மதிக்கும் அதேவேளை, தனது பிரஜை ஒருவருக்காக மேற்கொள்ளக்கூடிய அதிகபட்ச சட்ட மற்றும் மனிதாபிமான நடவடிக்கைகளை முன்னெடுப்பதே தற்போதைய நிலையில் முன்னுரிமையாக இருக்க வேண்டும் என அவர் தெரிவித்துள்ளார்.

வழக்கின் பின்னணி மற்றும் மேல்முறையீட்டு நிலை

நற்பிட்டிமுனையைச் சேர்ந்த அனோஜன், சவூதி அரேபியாவில் பணியாற்றி வந்த நிலையில், சமூக ஊடகங்களில் வெளியிட்டதாகக் கூறப்படும் ஒரு கருத்தை அடிப்படையாகக் கொண்டு கைது செய்யப்பட்டார்.

கடந்த ஜூலை 15ஆம் திகதி சவூதி நீதிமன்றமொன்றினால் அவருக்கு ஐந்து வருட சிறைத்தண்டனையும் 3 மில்லியன் சவூதி ரியால் அபராதமும் விதிக்கப்பட்டதாக தெரிவிக்கப்படுகிறது.

இதற்கு எதிராக தாக்கல் செய்யப்பட்ட மேல்முறையீட்டின் பின்னர், அந்தத் தண்டனை மரண தண்டனையாக அதிகரிக்கப்பட்டுள்ளதாக அவரது சட்டத்தரணி, ரியாத்திலுள்ள இலங்கை தூதரகத்திற்கு வாய்மொழியாக அறிவித்துள்ளதாக குறிப்பிடப்பட்டுள்ளது.

எவ்வாறாயினும், குறித்த தீர்ப்பின் உத்தியோகபூர்வ எழுத்துமூல பிரதியொன்று இதுவரை இலங்கை தூதரகத்திற்கு கிடைக்கவில்லை என வெளிவிவகார அமைச்சு தெரிவித்துள்ளது.

இது தொடர்பில் கருத்து தெரிவித்துள்ள ஜனாதிபதி சட்டத்தரணி பைசர் முஸ்தபா, தீர்ப்பின் சட்ட அடிப்படையை சரியாக புரிந்துகொள்வதற்கு அதன் எழுத்துமூல பிரதியை துரிதமாக பெற்றுக்கொள்வது அத்தியாவசியமானது எனக் குறிப்பிட்டுள்ளார்.

மேலும், சட்டத்தரணிகளின் ஆலோசனைக்கு அமைவாக அடுத்த ஒரு மாத காலப்பகுதிக்குள் சவூதி உயர் நீதிமன்றத்தில் மேல்முறையீடு செய்வதற்கான வாய்ப்பை எந்தவித தாமதமுமின்றி பயன்படுத்த வேண்டும் என்றும் அவர் வலியுறுத்தியுள்ளார்.

அரச மன்னிப்பு கோருதல் மற்றும் இஸ்லாமிய கொள்கைகள்

சர்ச்சைக்குரிய கருத்தை வெளியிட்ட சிறிது நேரத்திலேயே அதனை நீக்கி, அனோஜன் பகிரங்கமாக மன்னிப்புக் கோரியுள்ளதாக தெரிவிக்கப்படுகிறது.

இந்த விடயத்தை அடிப்படையாகக் கொண்டு, மனவருத்தம், மன்னிப்பு மற்றும் இரக்கம் ஆகியவற்றை முன்னிறுத்தும் இஸ்லாமிய அடிப்படைக் கொள்கைகளுக்கு அமைவாக சவூதி அதிகாரிகளிடம் மனிதாபிமான நிவாரணம் அல்லது அரச மன்னிப்பைக் கோருவதற்கான வலுவான பின்னணி உருவாகியுள்ளதாக பைசர் முஸ்தபா தெரிவித்துள்ளார்.

இலங்கைக்கும் சவூதி அரேபியாவுக்கும் இடையில் நீண்டகாலமாக நிலவி வரும் இராஜதந்திர உறவுகள் மற்றும் நட்புறவை பயன்படுத்தி, உயர்மட்ட அரச மட்டத்தில் பேச்சுவார்த்தைகளை முன்னெடுப்பதன் மூலம் இந்த இளைஞரின் உயிரைக் காப்பாற்றுவதற்கான வாய்ப்புகள் உள்ளதாகவும் அவர் குறிப்பிட்டுள்ளார்.

இந்த விடயத்தில் அரசாங்கமும் எதிர்க்கட்சியும் கட்சி வேறுபாடுகளுக்கு அப்பால் ஒன்றிணைந்து செயற்பட வேண்டும் என்றும் அவர் தெரிவித்துள்ளார்.

ரிஸானா நபீக் சம்பவத்திலிருந்து கற்றுக்கொள்ள வேண்டிய பாடங்கள்

சில ஆண்டுகளுக்கு முன்னர் சவூதி அரேபியாவில் மரண தண்டனையை எதிர்கொண்ட ரிஸானா நபீக் சம்பவத்தை நினைவுகூர்ந்த ஜனாதிபதி சட்டத்தரணி பைசர் முஸ்தபா, உரிய சட்ட ஆலோசனை, நம்பகமான சட்டப் பிரதிநிதித்துவம் மற்றும் சரியான மொழிபெயர்ப்பு வசதிகள் இல்லாததால் கடந்த காலத்தில் ஏற்பட்ட இழப்பு மிகவும் வேதனைக்குரியது எனக் குறிப்பிட்டுள்ளார்.

வெளிநாடொன்றில் இவ்வாறான பாரதூரமான சட்டப் பிரச்சினையை எதிர்கொள்ளும் எந்தவொரு இலங்கை பிரஜைக்கும் ஆரம்பம் முதலே உரிய சட்ட ஆலோசனையும் தொடர்ச்சியான இராஜதந்திர பாதுகாப்பும் வழங்கப்பட வேண்டும் என்பதை அந்த அனுபவம் உணர்த்துவதாகவும் அவர் தெரிவித்துள்ளார்.

இதற்கிடையில், நாடாளுமன்ற உறுப்பினர் சாணக்கியன் இராசமாணிக்கம், இந்த மேல்முறையீட்டு நடவடிக்கைகள் தொடர்பான சட்டத்தரணி பிரதிநிதித்துவம் மற்றும் கடிதப் பரிமாற்றங்கள் குறித்து சில கேள்விகளை எழுப்பியுள்ளார்.

எனினும், தற்போதுள்ள இராஜதந்திர பொறிமுறையின் ஊடாக குறித்த இளைஞருக்கு தேவையான அதிகபட்ச தூதரக உதவிகள் வழங்கப்பட்டு வருவதாக வெளிவிவகார அமைச்சு தெரிவித்துள்ளது.

வெளிநாட்டு தொழிலாளர்களின் பாதுகாப்பும் பொறுப்பும்

வெளிநாடுகளில் பணியாற்றும் இலங்கை தொழிலாளர்களுக்கு பொருத்தமான சட்ட உதவிகளை வழங்குவதற்கான முறையான கட்டமைப்பை பேணுதல், அவர்களது குடும்பங்களுக்கு சரியான சட்ட ஆலோசனைகளை வழங்குதல் மற்றும் வெளிநாடுகளின் சட்ட விதிமுறைகள், சமூக ஊடகப் பயன்பாட்டின் வரம்புகள் தொடர்பில் தொழிலாளர்களுக்கு முன்கூட்டியே விழிப்புணர்வை ஏற்படுத்துதல் ஆகியவற்றின் அவசியமும் இங்கு வலியுறுத்தப்பட்டுள்ளது.

தற்போதைய நிலையில் எந்தவித காலதாமதமும் இன்றி எழுத்துமூல தீர்ப்பைப் பெற்றுக்கொள்வது, சவூதி உயர் நீதிமன்றத்தில் வலுவான சட்ட மேல்முறையீட்டை தாக்கல் செய்வது மற்றும் இராஜதந்திர வழிமுறைகள் ஊடாக அனோஜனின் உயிரைக் காப்பாற்றுவதற்கான அதிகபட்ச முயற்சிகளை மேற்கொள்வதே முக்கிய கவனமாக இருக்க வேண்டும் என சட்ட நிபுணர்கள் சுட்டிக்காட்டுகின்றனர்.